​ဦးသိန်းစိန်က အစိုးရအဖွဲ့ဝင်ဟောင်းများကို တွေ့ဆုံကာ ဂုဏ်ပြုဧည့်ခံပွဲပြုလုပ်မည်

အာရှနှင့် အရှေ့ အာရှစီးပွားရေးဆိုင်ရာ သုတေသနဌာန (ERIA)မှ ဆုရရှိခဲ့ခြင်း ကြောင့် သမ္မတဟောင်း ဦးသိန်း စိန်က ၎င်း၏အစိုးရအဖွဲ့ဝင် အ ငြိမ်းစားဝန်ကြီးနှင့် ဒုဝန်ကြီးများ ကို မတ်လ ၁၉ ရက်တွင် နေပြည်တော်၌ တွေ့ဆုံကာ ဂုဏ်ပြုဧည့်ခံပွဲတစ်ရပ် ပြုလုပ်မည်ဖြစ်ကြောင်း ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (ပြည်ခိုင်ဖြိုး)မှ သတင်းရရှိသည်။
“ဒါကတော့ သမ္မတကြီး ဟောင်း ဦးသိန်းစိန်က သူ သမ္မတ တာဝန်ထမ်းဆောင်စဉ်က သူနဲ့ အတူတူလက်တွဲဆောင်ရွက်ခဲ့တဲ့ အငြိမ်းစားဝန်ကြီး၊ ဒုဝန်ကြီးတွေ နဲ့ လုပ်ဖော်ကိုင်ဖက်တွေကို ပူး ပေါင်းဆောင်ရွက်ခဲ့တဲ့ ပုဂ္ဂိုလ် တွေကို ဂုဏ်ပြုတဲ့ ညစာစားပွဲ လေ”ဟု ပြည်ခိုင်ဖြိုးပါတီသတင်း ထုတ်ပြန်ရေးအဖွဲ့ခေါင်းဆောင် ဦးပိုက်ထွေးက ပြောသည်။

ERIA က ပေးအပ်သော ဆုကို လက်ခံရရှိခြင်းသည် ၎င်းနှင့်အတူ အစိုးရအဖွဲ့ဝင်ဟောင်းများ ၏ ကြိုးပမ်းဆောင်ရွက်မှုကြောင့် ရရှိခဲ့သဖြင့် လက်တွဲဆောင်ရွက် ခဲ့သူများကို ဂုဏ်ပြုခြင်းဖြစ်သည် ဟု ဦးပိုက်ထွေးကဆိုသည်။

“ကျွန်တော်တို့ သမ္မတကြီး ကတော့ဗျ၊ သူရတဲ့ ဆုအပေါ်မှာ သူတစ်ယောက်တည်းကောင်းလို့ မဟုတ်ဘူး။ အများကောင်းလို့ဆို ပြီးတော့ ဒါတကယ်ကို လုပ်ဖော် ကိုင်ဖက်တွေအပေါ်မှာ အေးအတူ ပူအမျှ လက်ရည်တစ်ပြင် တည်း ဒီစိတ်ဓာတ်နဲ့ ဆောင်ရွက် တာပဲ” ဟု ၎င်းကပြောသည်။

ဦးသိန်းစိန်အား မြန်မာနိုင်ငံ ၏ ဒီမိုကရေစီပြုပြင်ပြောင်းလဲ ရေးအားထုတ်မှုတွင် ဦးဆောင်ခဲ့ သူတစ်ဦးအဖြစ် အာဆီယံနှင့် အရှေ့အာရှစီးပွားရေးဆိုင်ရာ သုတေသန (ERIA) က ၂ဝ၁၇ ဇန်နဝါရီအတွင်းက ဆုချီးမြှင့်ခြင်းဖြစ်ကာ ဆုသုံးမျိုးအနက် အထူးဆု (The Grand Prize)ကို ရရှိခဲ့ သည်။

အဆိုပါဂုဏ်ပြုဧည့်ခံပွဲတွင် ဦးသိန်းစိန်က နှုတ်ခွန်းဆက် စကားပြောကြားခြင်း၊ နိုင်ငံခြားရေးဝန်ကြီးဌာန ပြည်ထောင်စုဝန်ကြီး (ငြိမ်း) ဦးဝဏ္ဏမောင်လွင်က ဆုအကြောင်းရှင်းလင်းတင်ပြခြင်းတို့ ပြုလုပ်မည်ဟု ပြည်ခိုင် ဖြိုးပါတီ တာဝန်ရှိသူတစ်ဦးက ဆိုသည်။

“လက်ရှိအစိုးရအဖွဲ့က သူ တွေတော့ မပါဘူးဗျ။ သူနဲ့ တာ ဝန်ထမ်းဆောင်ခဲ့တဲ့ အစိုးရအဖွဲ့ ပြည်ထောင်စုဝန်ကြီးတွေ၊ ဒုဝန် ကြီးတွေ၊ ဗဟိုအာဏာပိုင်အဖွဲ့ အစည်းတွေ၊ ရွေးကောက်ပွဲကော် မရှင်တို့လို၊ အဂတိလိုက်စားရေး ကော်မရှင်တို့လို၊ တရားရေးဘက် က ဒါမျိုးလေးတွေပါမယ်။ လက် ရှိအစိုးရထဲကတော့ ဖိတ်ကြား ခြင်းမခံရပါဘူးခင်ဗျ”ဟု ၎င်းက ပြောသည်။

ပြီးခဲ့သည့် ဇန်နဝါရီအတွင်း က ဦးသိန်းစိန်သည် ERIA ကပေးအပ်သော ဆုကို ဂျပန်နိုင်ငံသို့ သွားရောက်ကာ လက်ခံရယူခဲ့ပြီး နေပြည်တော်၌ ၎င်းကို ပြည်ခိုင်ဖြိုးပါတီဝင်များက ဂုဏ်ပြုပွဲတစ် ရပ်ပြုလုပ်ခ့ဲသည်။ အဆိုပါ ဂုဏ်ပြုပွဲသို့ ပြည်ခိုင်ဖြိုးပါတီ ထိပ်ပိုင်းခေါင်းဆောင်များ၊ အစိုးရအဖွဲ့ ဝင်ဟောင်းများလည်း တက် ရောက်ခဲ့ကြသည်။

ဦးသိန်းစိန်သည် ပြည်ခိုင် ဖြိုးပါတီဗဟိုဦးဆောင်ကော်မတီ နာယကအဖြစ် တာဝန်ယူထားပြီး ပါတီဥက္ကဋ္ဌမှာ ရထားပို့ဆောင် ရေးဝန်ကြီးဌာန ပြည်ထောင်စုဝန် ကြီးဟောင်း ဦးသန်းဌေးဖြစ် သည်။ ဦးသိန်းစိန်ကို လေးစား ကြည်ညိုသော မြန်မာနိုင်ငံတစ် ဝန်းရှိ လူငယ်များက ပြီးခဲ့သည့် ရက်ပိုင်းအတွင်းက နေပြည်တော် တွင် ဂါရဝပြုပွဲတစ်ရပ် ပြုလုပ်ခဲ့သည်။

ထို့အပြင် ဦးသိန်းစိန်သည် မတ်လ ၁၆ ရက်က မန္တလေးမြို့၌ တိုင်းခရိုင်အဆင့် ပြည်ခိုင်ဖြိုးပါတီခေါင်းဆောင်များနှင့် တွေ့ဆုံ၍ လတ်တလော ဖြစ်ပျက်နေ သည့် နိုင်ငံရေး၊ စီးပွားရေး၊ လူမှုရေး၊ လုံခြုံရေး၊ တည်ငြိမ်အေး ချမ်းရေးနှင့် ဖွံ့ဖြိုးရေး စသည့် နယ်ပယ်အသီးသီးတွင် အခြေအနေ အရပ်ရပ်ကို နိုင်ငံတကာနှင့် နှိုင်းယှဥ်သုံးသပ်ရန် ထည့်သွင်းပြော ကြားခဲ့သည်။ ထို့အပြင် ပြည်သူ များ လက်ငင်းရင်ဆိုင်နေရသည့် ပြဿနာများ ရင်ဆိုင်ဖြေရှင်း ကူညီခြင်းဖြင့် ပြည်သူလူထု၏ ယုံကြည်မှု တည်ဆောက်ရန် ဆွေးနွေးခဲ့ကြောင်း ဝန်ကြီးဟောင်း ဦးအုန်းမြင့်၏ ဖေ့စ်ဘွတ်ခ်တွင် ရေးသားထားသည်။

#7DN

​သူနာပြုများ၏ တောင်းဆိုချက် နှစ်ဖက်တွေ့ဆုံညှိနှိုင်း သဘောတူညီချက်ရ

ဌာနက ဖွဲ့စည်းပေးထားသော တွေ့ဆုံဆွေးနွေးရေးအဖွဲ့ဝင်အချို့ကို တွေ့ရစဉ် (ဓာတ်ပုံ − နစ်ကီ)

သူနာပြု ကျောင်းသူ၊ ကျောင်းသားများ၏ တောင်းဆို ချက်များနှင့်ပတ်သက်၍ မတ်လ ၁၇ရက်တွင် ဝန်ကြီးဌာနနှင့် သူ နာပြုတက္ကသိုလ် ကျောင်းသူ၊ ကျောင်းသားများ နှစ်ဖက်တွေ့ဆုံညှိနှိုင်းကာ သဘောတူညီချက်ရရှိခဲ့ကြောင်း ကျန်းမာရေးနှင့် အားကစားဝန်ကြီး ဒေါက်တာမြင့်ထွေးက ပြောကြားသည်။
“နားလည်မှုလွဲတာပါ။ အား လုံးအဆင်ပြေတယ်။ ကျွန်တော် တို့က နှစ်ဦးနှစ်ဖက် အကုန်ပေါင်း လုပ်ရမှာဖြစ်ပါတယ်။ ဟိုဘက် အမြင်၊ ဒီဘက်အမြင်အကုန်စဉ်း စားရမှာပါ။ အကုန်အဆင်ပြေ အောင်လုပ်ပေးမယ်”ဟု ရန်ကုန် သူနာပြုတက္ကသိုလ်၌ ဝန်ကြီးဌာန နှင့် သူနာပြုတက္ကသိုလ် ကျောင်း သားများ တွေ့ဆုံပွဲအပြီးတွင် ဝန်ကြီးက ပြောသည်။ကျန်းမာရေးနှင့် အားကစားဝန်ကြီးဌာန လက်အောက်ရှိ ဆေးကုသရေးဦးစီးဌာနက ပုဂ္ဂလိကဆေးရုံများတွင် သူနာပြုနှင့် သားဖွားတက္ကသိုလ်၊ သင်တန်းကျောင်းများနှင့်သဘောတူစာချုပ်ချုပ်ဆိုထားသည့် စာချုပ်ဖောက်ဖျက်သော သူနာပြုနှင့် သားဖွားများအား ခန့်အပ်တာဝန်မပေးစေရေး ကြပ်မတ်ဆောင်ရွက်ရန်ဟူသော ညွှန်ကြားချက် ကို ဖေဖော်ဝါရီ ၁ ရက်က ထုတ်ပြန်ခဲ့ခြင်းနှင့်ပတ်သက်၍ မတ်လ ၁၅ ရက်က သူနာပြုတက္ကသိုလ်ကျောင်းသူ၊ ကျောင်းသားများ ဆန္ဒထုတ်ဖော်ခဲ့သည်။ ထို့နောက် နှစ်ရက်အကြာ၌ ဝန်ကြီးဌာနနှင့် သူနာပြုတက္ကသိုလ် ကျောင်းသားများ နှစ်ဦးနှစ်ဖက်တွေ့ဆုံညှိနှိုင်းခဲ့သည်။

သူနာပြု/သားဖွားကိစ္စရပ် များအတွက် ဆက်သွယ်ဆောင် ရွက်ရန် မတ်လ ၁၆ရက်က နေ ပြည်တော်ကုသရေးဦးစီးဌာန ဒု ညွှန်ကြားရေးမှူးချုပ် ဦးဆောင် သော  အဖွဲ့ဝင် ခုနစ်ဦးပါဝင်သည့် အဖွဲ့ကို ဖွဲ့စည်းခဲ့ပြီး မတ်လ ၁၇ ရက်၌ အဆိုပါအဖွဲ့နှင့် ကျန်းမာရေးနှင့် အားကစားဝန်ကြီး ဒေါက်တာမြင့်ထွေးတို့ တွေ့ဆုံဆွေးနွေးသည်။ ထို့နောက် သူနာပြုတက္ကသိုလ်ကျောင်းသူ၊ ကျောင်းသားများနှင့် နှစ်နာရီကျော်ကြာ ထပ်မံတွေ့ဆုံ၍ သဘောတူညီချက်ရရှိခဲ့သည်။

ညှိနှိုင်းရာတွင် ဝန်ကြီး ဌာနဘက်က သူနာပြုများတောင်း ဆိုသည့် ကျောင်းပြီးပါက ယခင် ထုတ်ပေးနေကျ ယာယီလိုင်စင် မ ဟုတ်ဘဲ အမြဲတမ်းလိုင်စင်ထုတ် ပေးရန်ဟူသောအချက်ကို လိုက် လျောပြီး သူနာပြုများဘက်က ကျောင်းပြီးပါက သူနာပြုတက္က သိုလ်ဝင်ရောက်စဉ်စာချုပ်ချုပ်ဆို ခဲ့သည့်အတိုင်း နိုင်ငံ့တာဝန်ကို ၃ နှစ် မပျက်မကွက် ထမ်းဆောင်ပေးရန်ဟူသော အချက်ကို သဘောတူခဲ့သည်။

“လက်ရှိသူနာပြုတွေအနေ နဲ့ ကျောင်းပြီးလို့ နိုင်ငံ့တာဝန်ထမ်း ရင် လိုင်စင်လိုမျိုးအကျိုးသက် ရောက်မှုရှိတဲ့ ယာယီလိုင်စင်ကို ထုတ်ပေးတယ်။ အခုညိှနှိုင်းတဲ့အ ခါကျတော့ ယာယီလိုင်စင်မဟုတ် ဘဲ လိုင်စင်စာအုပ်ကိုပေးမယ်။ ဒါပေမဲ့ သူနာပြုတွေအနေနဲ့က တော့ ကျောင်းပြီးရင် နိုင်ငံ့တာဝန် ကို ထမ်းကိုထမ်းရပါမယ်။မထမ်း ရင် လိုင်စင်ပေးမှာမဟုတ်ဘူး။ အရင်လို နိုင်ငံ့တာဝန် မထမ်းရင် လျော်ကြေးပေးမလားဆိုတာမျိုး မဟုတ်တော့ဘူး။ အခုလာမယ့် ၂ဝ၁၈မှာ စတက်မယ့်သူနာပြုတ က္ကသိုလ်ကျောင်းသားတွေက စပြီး လျော်ကြေးစနစ်ကို ပယ်ဖျက် မယ်။ အရင်လို လျော်ကြေးမရှိ တော့ဘူး။ ကျောင်းပြီးရင် သုံးနှစ် နိုင်ငံ့တာဝန်ထမ်းဆောင်၊ လိုင် စင်ထုတ်ပေးမယ်”ဟု သူနာပြု/ သားဖွား ကိစ္စရပ်များအတွက် ဆက်သွယ်ဆောင်ရွက်ရန် တာ ဝန်ပေးအပ်ထားသည့်အဖွဲ့ ဒုတိယခေါင်းဆောင်ရန်ကုန်တိုင်းဒေသကြီးကုသရေးဦးစီးဌာနမှ ဒေါက်တာ သာထွန်းကျော်က ပြောကြားသည်။

ထို့အပြင် ဆန္ဒထုတ်ဖော်ရာ တွင် ပါဝင်ခဲ့သည့် သူနာပြုတက္က သိုလ်ကျောင်းသူ၊ ကျောင်းသား များအားအရေးယူမည်ဟု ဝန် ကြီးဌာနဘက်က သတင်းထွက် ပေါ်နေမှုအပေါ်၌လည်း ကျန်းမာ ရေးနှင့်အားကစားဝန်ကြီးဌာန ဘက်က အရေးယူမည် မဟုတ်တော့ပေ။

ထို့အပြင် လိုင်စင်ကိစ္စ၊ နိုင်ငံ့တာဝန်ထမ်းဆောင်ရန် အချက်များအပါအဝင် သူနာပြုနှင့် သားဖွားများသည် မြန်မာနိုင်ငံ သူနာပြုနှင့် သားဖွားကောင်စီဥပဒေနှင့် ချမှတ်ထားသော ကျင့်ဝတ်၊ စည်းမျဥ်းစည်းကမ်းများ လိုက်နာရန်၊ နောက်နောင်အလားတူအရေး ကိစ္စရပ်များ ပေါ်ပေါက်လာပါက ဌာနတွင်းမိသားစုသဖွယ် ညိှနှိုင်းဆွေး နွေးအဖြေရှာ ဆောင်ရွက်ရန်နှင့်  ဝန်ကြီးဌာနက သူနာပြုသားဖွား များ၏ လုပ်ငန်းခွင်ပျော်ရွှင်သာ ယာရေးနှင့် ဘဝတိုးတက်ရေးအ တွက် ဆောင်ရွက်ပေးနေပြီး ဦး စားပေးအနေဖြင့် ဆက်လက် ဆောင်ရွက်ပေးမည်ဖြစ်ကြောင်း ပါရှိသည်။

အဆိုပါညှိနှိုင်းသဘောတူ ထားသည့်ကိစ္စရပ်နှင့်ပတ်သက်၍ “ကျေနပ်တယ်။ အားလုံးညှိနှိုင်း ပြီးလုပ်ထားတဲ့ဟာပဲ ကျေနပ်ပါ တယ်”ဟု ဆန္ဒဖော်ထုတ်ရာတွင် ပါဝင်သည့် သူနာပြုတက္ကသိုလ် ကျောင်းသူ မကေခိုင်ထွန်းက ပြောသည်။

#7DN

​ကွန်တိန်နာယာဥ်များ နေ့ပိုင်း ဖြတ်သန်းမောင်းနှင်ခွင့် တိုင်းအစိုးရခွင့်ပြု

ရန်ကုန်တိုင်းဒေသကြီး အစိုးရအဖွဲ့ ခွင့်ပြုချက်ဖြင့် ကမ်း နားလမ်းနှင့် ဘုရင့်နောင်လမ်းမ ကြီးများတွင် ကွန်တိန်နာယာဥ် များကို မတ်လ ၁၆ ရက်ကစ၍ နံနက် ၁၁ နာရီမှ မွန်းလွဲ ၃နာရီ အတွင်း ဖြတ်သန်းမောင်းနှင်ခွင့် ပြုလိုက်သည်။
 ယခုခွင့်ပြုချက်သည် ဆိပ်ကမ်းမှအထွက် သွင်းကုန်  (Im-port) ကွန်တိန်နာယာဥ်များ အတွက်သာဖြစ်ပြီး ဆိပ်ကမ်းသို့ ပို့ကုန် (Export)ယာဥ်များအတွက် ခွင့် ပြုချက်မရရှိသေးကြောင်း မြန်မာ နိုင်ငံ ကုန်သေတ္တာတင်မော်တော် ယာဥ်များအသင်း အထွေထွေအတွင်းရေးမှူး ဦးစိုးနိုင်ကပြော ကြားသည်။

လက်ရှိကာလသည်နိုင်ငံ၏ သွင်းကုန်ပို့ကုန် လုပ်ငန်းများလုပ် ကိုင်ရသော ပွင့်လင်းရာသီဖြစ်၍ ယခုကဲ့သို့ ဖြေလျှော့ခွင့်ပြုခဲ့ခြင်း ဖြစ်ကြောင်း၊ ခွင့်ပြုမိန့်သည် ယာ ယီသဘောသာဖြစ်ပြီး ယာဥ်အ သွားအလာလမ်းကြောင်းများအ ပေါ်မူတည်၍ အတည်ပြုသတ် မှတ်နိုင်ကြောင်း ဦးစိုးနိုင်က ဆက်လက်ပြောသည်။

‘‘အခုကတော့ ယာယီပေါ့။ ဒီလမ်းကြောင်းပေါ်မှာ အဆင်ပြေ ပါတယ်ဆိုရင်တော့ တောက် လျှောက်ဆက်ရသွားနိုင်တာပေါ့။ ရမယ်လို့တော့ ထင်တာပဲ’’ဟု၎င်း ကဆိုသည်။

သင်္ကြန်ကာလ ရောက်ရှိတော့မည်ဖြစ်၍ ပိတ်ရက်များတွင် ရပ်ဆိုင်းထားမည့် လုပ်ငန်းများအတွက် လက်ရှိ၌ အထူးကိစ္စတစ်ရပ်အနေဖြင့်တွန်း အားပေး ဆောင်ရွက်ရန်လိုအပ်နေသဖြင့် ကမ်းနားလမ်းနှင့်  ဘုရင့်နောင်လမ်းမကြီးများတွင် နေ့အချိန် ကုန်သေတ္တာယာဥ်များ ဖြတ်သန်းအသုံးပြုရန် ပို့ကုန်၊ သွင်းကုန် လုပ်ငန်းရှင်များနှင့်မြန်မာနိုင်ငံ ကုန်သေတ္တာအသင်းတို့ကတင်ပြ ခဲ့သည်။

ရန်ကုန်မြို့တွင်ကုန်သေတ္တာ ယာဥ်များကိုပြီးခဲ့သည့် ဒီဇင်ဘာ ၇ ရက်ကစ၍ အရှေ့ပတ်လမ်းနှင့် အနောက်ပတ်လမ်းဟူ၍ ခွဲခြား ကာ ည ၉ နာရီမှ နံနက် ၆ နာရီ အထိ မောင်းနှင်ခွင့်ပြုထားသည်။

အရှေ့ပတ်လမ်းဖြစ်သည့် သံသုမာလမ်းနှင့် ဝေဇယန္တာလမ်း တို့တွင် နေ့ဘက်မောင်းနှင်ခြင်းကို ဖေဖော်ဝါရီ ၇ ရက်က ပြန်လည် ခွင့်ပြုခဲ့သည်။ ယင်းနောက်ပြီးခဲ့ သည့်ရက်ပိုင်းအတွင်း အနောက် ပတ်လမ်းဖြစ်သည့် ကမ်းနားလမ်း နှင့် ဘုရင့်နောင်လမ်းတို့၌ နံနက် ၁၁ နာရီမှ မွန်းလွဲ ၃ နာရီအထိ ပြန်လည်မောင်းနှင်ခွင့်ပြုရန် ဖြေ လျှော့ခွင့်ပြုခဲ့သည်။

‘‘၁၁ နာရီနဲ့ ၃ နာရီက အ လုပ်တက်အလုပ်ဆင်းချိန်မဟုတ် တဲ့အတွက် ကျွန်တော်တို့ကား တွေသွားရင် ယာဥ်ကြောမကျပ် နိုင်သေးဘူး။ ဒါကြောင့် တောင်း ဆိုထားတာပါ’’ဟု ကုန်သေတ္တာ ယာဥ်လုပ်ငန်းရှင် ဦးဝင်းစိန်က ပြောသည်။

 ကုန်သေတ္တာယာဥ်များကို ည ၉ နာရီမှ နံနက် ၆ နာရီအထိ သတ်မှတ်လမ်းကြောင်းများအ တိုင်း ပြေးဆွဲခွင့်ပေးမည်ဟု ရန် ကုန်တိုင်းဒေသကြီး လုံခြုံရေးနှင့် နယ်စပ်ရေးရာဝန်ကြီး ဗိုလ်မှူး ကြီးတင်အောင်ထွန်းက ၂ဝ၁၆ အောက်တိုဘာက တိုင်းဒေသကြီး လွှတ်တော်၌ ပြောကြားရာမှ ၂ဝ၁၆ နှစ်ကုန်၌ အကောင်အ ထည်ဖော်ခဲ့သည်။

ညအချိန်မှသာ မောင်းနှင်ရမည်ဟု ကန့်သတ်သည့်ပထမဆုံးနေ့ က ကမ်းနားလမ်းတစ်လျှောက် တွင်ကုန်သေတ္တာယာဥ်များနာရီ ပေါင်းများစွာ လမ်းပိတ်ဆို့သည် အထိ အခြေအနေဆိုးရွားခဲ့သည်။

#7DN

​ပို့ကုန်မြှင့်တင်ရန် စီစဥ်ရာတွင် ဒေသတွင်းနိုင်ငံများနှင့် နှိုင်းယှဥ်ပါက စိန်ခေါ်မှုများရှိဟု စီးပွားကူးသန်းဝန်ကြီးပြော

ပို့ကုန်၊ သွင်းကုန်လုပ်ငန်းတွင် အဓိကကျသော ကုန်သေတ္တာများကို ဆိပ်ကမ်းတစ်ခု၌ တွေ့ရစဥ် (ဓာတ်ပုံ − စိုင်းဇော်)

လယ်ယာထွက်ကုန်များနှင့် အသေးစားနှင့် အလတ်စား (SME) ထုတ်ကုန်များဖြင့် ပို့ကုန် ကဏ္ဍကို တိုးမြှင့်ရန် စီစဥ်ခဲ့သော် လည်း စျေးနှုန်းနှင့် အရည်အသွေး က အဓိကစိန်ခေါ်မှုဖြစ်လာသည် ဟု စီးပွားရေးနှင့် ကူးသန်းရောင်း ဝယ်ရေးဝန်ကြီးဌာန ပြည်ထောင် စုဝန်ကြီး ဦးသန်းမြင့်က ပြောကြားသည်။
ပြည်ပသို့ တင်ပို့သည့် သဘာဝဓာတ်ငွေ့အပါအဝင် တွင်းထွက် သယံဇာတများ တန်ဖိုးလျော့ကျ ခြင်းကြောင့် လယ်ယာထွက်ကုန် များနှင့် အသေးစားနှင့် အလတ် စားထုတ်ကုန်များကို အစားထိုး၍ တိုးမြှင့်တင်ပို့ခြင်းဖြင့် ပို့ကုန်မြှင့်တင်ရန် အစိုးရက စီစဥ်သော်လည်း အခက်အခဲများစွာရှိကြောင်း ဝန်ကြီးက ပြောကြားသည်။

လယ်ယာထွက်ကုန်ကဏ္ဍ တိုးမြှင့်နိုင်ရန် အထွက်နှုန်းလျော့နည်းမှု၊ တစ်ဧကအတွက် စိုက်ပျိုးစရိတ်ကြီးမားမှုစသည်တို့က အာဆီယံဒေသ အတွင်းရှိ လာအို၊ ကမေ္ဘာဒီးယားနိုင်ငံများနှင့် နှိုင်းယှဥ်ပါက ကုန်ကျစရိတ်ပိုများနေခြင်းသည် အစိုးရ၏ ပို့ကုန်မြှင့်တင်ရေးတွင် အခက်အခဲဖြစ်နေသည်ဟု ဝန်ကြီးက ဆက်လက်ပြောကြားသည်။

ထို့အပြင် အသေးစား၊ အ လတ်စားလုပ်ငန်းများမှ ထုတ်ကုန်များတိုးမြှင့်တင်ပို့ခြင်းဖြင့် ပို့ကုန် ကဏ္ဍမြှင့်တင်ရေးဆောင်ရွက်ရန် သယ်ယူပို့ဆောင်စရိတ် ကြီးမြင့်ပြီး၊ အရည်အသွေးပိုင်း ယှဥ်ပြိုင်ရန် အားနည်းချက်များရှိနေကာ နိုင်ငံတကာစျေးကွက်တွင် စျေးနှုန်းယှဥ်ပြိုင်ရောင်းချရန် အခက်အခဲများရှိကြောင်း ၎င်းက ပြောသည်။

‘‘လယ်ယာကဏ္ဍနဲ့ SME တွေကိုပဲ အဓိကထားအားကိုးဖို့ရှိ ပေမယ့် အခက်အခဲ စိန်ခေါ်မှု တော့ရှိတယ်။ ဒါတွေကို အစိုးရ၊ ပုဂ္ဂလိကပူးပေါင်းဖြေရှင်းသွားနိုင် မယ်လို့ ထင်ပါတယ်’’ဟု ဦးသန်းမြင့်က မတ်လ ၁၆ ရက်တွင် ဒုတိယသမ္မတဦးမြင့်ဆွေနှင့် စီးပွားရေးလုပ်ငန်းရှင်များ ရန်ကုန်မြို့ရှိ မြန်မာနိုင်ငံ ကုန်သည်စက်မှုအသင်းချုပ်ရုံး၌ ပြုလုပ်သော တွေ့ဆုံပွဲတွင် ပြောကြားသည်။

မြန်မာနိုင်ငံ၏ အဓိကပို့ကုန်ဖြစ်သော သဘာဝဓာတ်ငွေ့စျေးနှုန်းကျဆင်းမှုကြောင့် ယခုဘဏ္ဍာနှစ်အတွင်း ဝင်ငွေကန်ဒေါ်လာ ၁ ဒသမ ၄ ဘီလီယံလျော့ကျခဲ့ပြီး၊ သစ်တောထုတ်ကုန်များ၊ ကျောက်စိမ်းထုတ်လုပ်မှု လျော့ကျနေသည်ဟု ပြည်ထောင်စုဝန်ကြီးက ပြောသည်။ ထို့ကြောင့် ဒီချုပ်အစိုးရ လက်ထက် ၁၁ လအတွင်း ကုန် သွယ်ရေးကဏ္ဍတွင် လိုငွေပမာ ဏသည် ကန်ဒေါ်လာ ငါးဘီလီယံခန့်ရှိကြောင်း စီးပွားရေးနှင့် ကူးသန်းရောင်း ဝယ်ရေးဝန်ကြီးဌာန စာရင်းများအရ သိရသည်။

#7DN